Maria Helena Vieira da Silva: Espazioaren anatomia

Erakusketa Lisboan jaiotako eta Frantzian herritartutako Maria Helena Vieira da Silva (1908–1992) artistaren lengoaia bisualak izandako bilakaeraren azterketa sakona da. Gaika antolatutako zortzi ataletan zehar, erakusketak Vieira da Silvaren ibilbidearen mugarri garrantzitsuenak aztertzen ditu, 1930eko hamarkadatik 1980ko hamarkadaren amaierara arte, eta arreta berezia jartzen du espazio arkitektonikoarekiko zuen interesean. Benetako eta irudimenezko hiri-paisaien arteko mugak lausotuta, Portugaleko kultura bisualaren erreferentzia formaletatik, eta kubismoa eta futurismoa bezalako abangoardiako mugimenduetatik harago joan zen Vieira da Silva.